За прв пат во рамките на филмската програма на Ехо Фестивалот за планински филмови, ќе имаме категорија за најдобар еколошки филм.Честа да ги селектираат и оценуваат најдобрите Еколошки филмови во конкуренција од пријавени 46 филмови, и одбрани 8 финалисти кои воедно ќе бидат прикажани за време на 10тото издание на фестивалот ЕХО ќе бидат членовите на Македонското Еколошко друштво и долготрајни пријатели на фестивалот:
Данка Узунова, Македонско еколошко друштво
Израсната во Гевгелија. Од мали нозе покажува интерес за природата, кој продолжува во студии по екологија и професионално истражување на птици. Преку 10 години работи во Македонско еколошко друштво, каде директно придонесува за развојот на орнитологијата (наука за истражување птици) во Македонија. Нејзин најзначаен придонес е подобрување на познавањето на презимувачките водни птици во Македонија и во развојот на Вториот европски атлас на птици гнездилки. Моментално, таа е претставник на координаторите за зимско пребројување на водни птици на територијата на Западен Палеарктик.
Александар Павлов, проектен асистент во Македонското еколошко друштво
Александар Павлов е роден во 1986 година во Скопје. По образование е лингвист и биолог. Има долгогодишно искуство како преведувач и толкувач од англиски јазик и обратно. Од 2018 година работи во Македонското еколошко друштво на Програмата за закрепнување на балканскиот рис. Низ своите професионални активности тој се бори за овој редок подвид преку едукација во основните училишта и заложби за прогласување заштитени подрачја во земјата. Честопати е во природа, каде врши теренски истражувања на крупни месојадни животни и ситни цицачи, а се вклучува и во останатите активности на Друштвото.
Фросина Пандурска-Драмиќанин, проектен координатор во Македонско еколошко друштво
Фросина Пандурска-Драмиќанин е магистер по социолошки науки на Институтот за Социолошки и политичко-правни истражувања во Скопје. Има
големо искуство како лице за односи со јавност и работела на повеќе национални и регионални проекти како ПР. За време на нејзиното работење како новинар во Алсат-м и МИА во периодот од 2007-2011 има добиено 5 новинарски награди од меѓународни организации на повеќе различни теми (климатски промени, заштита на диви видови, сиромаштија и културен соживот). Во Македонско еколошко друштво работи на проекти од 2011 година во тимот за комуникации и Програмата „Луѓе и Природа“. Нејзиниот ангажман се однесува на активности поврзани со комуникација, истражување за користење на природните ресурси, подигнување на јавна свест и едукација за прашања поврзани со заштита на природа во постоечки или идни заштитени подрачја. Од 2015 година е член на платформата Пријатели на Шара, формирана со мисија идно прогласување на Шар Планина за национален парк.
